Latgolai ir vajadzeiga sova parteja Latvejis Saeimā

Dažaiduos puorstaipteikla diskusejuos, kuruos par Latgolai aktualim vaicuojumim īzasaista na tikai latgalīši, bet ari cytu nūvodu ļauds, reidzinīkus īskaitūt, naratai bejuši izsaceiti puormatumi latgalīšim, ka eistineibā myusim nikai nainteresejūte nūvoda stuovūklis juo kūpeibā – voi tī runa byutu par latgaļu volūdys statusu, voi ar cytim nūvodim nasaleidzynuojami leluokū bezdorba leimeni, nūvoda saimesteibys pagrimšonu daudž dziļuok par vysim cytim Latvejis nūstyurim itt. Puormasts teik pavysam konkretai – par itaidu pasalaišonu dalīcynuojūte tys, ka Latgolys ļauds leidz šam breižam navā izveiduojuši nivīnu eistynai latgalisku politisku organizaceji, kas par nūvodu ceineitūs vysys Latvejis mārūgūs, golvonūkuort parlamentā, t.i., Saeimā.

Par tū maņ ir vaicuojums vysim „Latgolys Saeimys” dalinīkim i cytim, kas jai vēļ dasavīnuosīs – kaidā politiskajā vierzīnī tāmātai ir juobyut taidai Latgolu puorstuovūšai partejai? Piec muna redzīņa jai nūteikti juojam atbolsts viesturis nūtykumu veiduotojuos tradicejuos. Zam svešu i nažieleigu laiceigūs varu spīdīņa olpym vīneigais latgaļu tautys bolsts i sorguotuoja beja katuoļu Bazneica. Bet šudiņ daļa sabīdreibys jai par tū atmoksoj ar bezdīveibu, vīnaldzeibu i cytim nuoveigim grākim. Tok itī grāki pyrmā kuortā īt par slyktu pošai tautai, kura nasaturīs pi Dīva lykumu. Vysdreižuok, ka teiši deļ tuo niulejūs laikūs, kur atjaunuotajā breivajā Latvejā nūvoda ļaudim jau padsmit godu beidzūt beja īspieja kai nakai sevi sajaust, izprast, vysa golā – izsist sevi cauri vysom nasaprašonom i izdareit korektu, bet styngru spīdīni pret Reigys birokrateji i juos aprūbežuoteibu vysys vaļsts i Latgolys lītuos, tūmār nu tuo vysa tikpat kai nikas nav izadevīs. Leluos partejis da Latgolai puorsvorā ir braukuojušis piec vālātuoju bolsim, bet jūs syuteituos soldonuos laksteigolys, lelūs mārūgūs jamūt, ir dorbuojušuos tikai sovam privatam lobumam.

I tai – lyudzu apsprīst dūmu par LATVEJIS KRISTEIGI SOCIALUOS SAVĪNEIBYS dybynuošonu, kur itei parteja ījimtu kreisi centriska spāka vītu vaļsts politiskajā „dardedzē”, styngrai īzastuojūt pret vasalu ryndu Reigys liberaļu vysatļauteibys, kapitala plieseiguma i cītsirdeibys pret tautu radeitajom krūpleibom, kas tagad izsyuc sabīdreibys spākus.

LATVEJIS KRISTEIGI SOCIALUO SAVĪNEIBA – Tovys dūmys i bolss „PAR” voi „PRET”?

Komentari (6)

RSS sateit / rozteit
+
0
Latvejis parteju sistema ir reiceibys naspiejeiga. Vysus itūs godus beja izkrūpļuota parteju finansiešonys sistema, kas nūvede pi tuo, ka myusim nav nivīnys eistys partejis i nav ari cylvaku ticeibys nivīnai. Pašreizejuo sitema ir taida: nauda reklamai = panuokumi vieliešonuos. Voi Tev ir īspiejis i gribiešona īgryust lelu naudu, kab tyktu pi varys?

Veidojam «Latgolys Saeimu», kas STRUODUOTU Latgolys lobā i dareitu Tevis pīsauktuos lītys. As skaitu, partejis veiduošõna nav «pyrmais sūļs», bet gon suokuma vajadzeiga tautys (vysmoz aktivuos dalis) salīdiešona i tikai tod redzēsim īspiejamūs nuokamūs sūļus…
Lobs materials: www.tautasforums.lv/?p=1143
avatar

jureits

  • 17 seņtabra 2009, 10:38
+
0
Ir itei sistema voi nav reiceibys spiejeiga, vīnolga jei ir vīneiguo demokratejis forma Latvejā i Eiropys Savīneibā. Turkluot nikaidys cytys sabīdriskys darbeibys formys šudiņ navar leidzvierteigi stuovēt pretim niulejūs parteju nagribiešonai voi naspiejai īraudzeit i sadzierdēt, kas tautys dziļumā ir svareiguokais. Ituos partejis beistās tikai i vīneigi nu konkurencis iz tom pošom 100 vītom parlamentā – ni nu kuo cyta. Bet saite „nauda, reklama = panuokumi”, lai cik ir svareiga, tūmār nav vīneiguo. Vēļ svareiguok ir saprast, var voi vairs navar atrast, atmūdynuot kaidus dažus symtus cylvāku Latgolā teiri latgaliska politiska instrumenta izveiduošonai. Nivīna parteja nu Reigā taiseitūs deļ Latgolys nikuo nav leidz šam izdarejuse i nadareis vairuok par parunuošonu da pasūleišonu, tū juos jau ir daruodejušis da mīļom. Reigu naspiej kustynuot i lykumeiguo vītejuo Latgolys vara. Nacik seņ Latgolys pošvoldi uzraksteja viestuli Reigai par katastrofu medicinā i školuos, kur nu budžeta teik atjemti leidz 80% leidzekļu. Reakcejis praktiski nav nikaidys. I nabyus, lai tī kū i kai sūlejuos protesteit viestulis paraksteituoji.

Kas atsatīcās iz naudys, tod ar juos savuokšonu juoteik golā vysai partejis saimei, navys vīnam voi divejim juos bīdrim. Kur ir vīns naudys deviejs, tī suokās juo diktatura, kū ari redzim vysmoz divejuos partejuos, kurys irā tykušis niulejā LR Saeimā.

Cerams, ka „Latgolys Saeima” varātu izaveiduot par lobu diskuseju vītu, tūmār nu vaļsts varys redzīņa jei nav nikaids leģitims varys atzors, ar kū jai dasaītu piec lykuma riekinuotīs. Tei ir interneta klubeņš, taids pats, kai tys tautasforums.lv voi tī kaids cyts, kurš kotrs čats, kur var tautys sakruotū tvaiku izlaist šviļpē, kai tū piec „bruģa revolucejis” i izdareja pingvini.lv i tī, kas jūs tymā eistuokajā breidī kai iz pasyutiejuma sataiseja. Maņ cīš grybātūs, lai ar laiku „LG Saeimā” pīsadaleitu vysmoz puori vīnam symtam daleibnīku, kuri nu Latgolys redzīņa apsavārtu vysys vaļsts lītys, i lai jūs kod na vīn varātu sasaukt iz eistu sapuļci, na tikai pazeit virtuali.
Vyspuor latgaliskom partejom vajadzieja rastīs jau piec 1992. gods, bet šudiņ mes varam tikai cerēt, ka situaceja tūmār kod na vīn varātu izamaineit iz lobū pusi, kod rostūs koč vīna taida parteja voi divejis. Cytaižuok latgalīšu politiskuos tradicejis jau ir praktiski iznycynuotys. Taipoš latgaliskū rokstu volūdu labi zyna na vairuok kai puors dasmytu profesionalu filologu, bet navā profesionalu žurnalistu, kuri dīniškai lītuotu gramatiski pareizu latgaļu rokstu volūdu, par tū ka navā presis, kas regulari iznuoktu drukuotā veidā. Par normalu saimesteibys leimeni Latgolā ari nikai navarim runot, par tū ka vairuok kai 95% Latgolā ir seikys i vuojis naturaluos lauku saimesteibys vīnys gimenis vajadzeibom, bet cik nacik leluokys ryupnīceibys latgaļu rūkuos praktiski nav, rajonu mīsti ir tikpat kai tukši nu dorbspiejeigu ļaužu, juo jī ir aizbāguši voi nu da Reigai, voi vyspuor ir atsavadejuši nu ituos valsts, kura jūs leidz šam ir tikai muonejuse i plāsuse. Tai ka 50 sovjetu i 20 breivuos Latvejis godi šudiņ Latgolai skaņ jau kuona kai nuovis sprīdums, ka tauta vairs nav izruodejuse gribiešonu itū pagrimšonu nūvērst.

Tys ir svareiguokais vaicuojums – voi tauta izruodeis gribiešonu par sevi ceineitīs, voi latgaļim latgaliskais šudiņ vairs ir koč kaida vierteiba.
avatar

juoneits

  • 23 seņtabra 2009, 17:19
+
0
princypā pareizai tu vysu stuost, bet suoksim «sūli pa sūļam»… taitod vyspyrms juoatrūn tī 100 Latgolā aktivi i sabīdreibā pazeistami cylvāki! Suokumam īsok kaidus pīcus!
Deļ tam ka vajag myusim pošim organizētīs i sazadorbuot. Ka byus savstarpejis sazinis i sadarbeibys sistema, mes varēsim parteji nūdybyunuot vīnā momentā (koč ari jūprūjom skaitu — tys nav golvonais uzdevums) i cytys leluokys lītys padareit. Deļ tuo ir juoīlīkn lobs PAMATS — pa druskai aicynoju cylvākus «kūpā dareit». Taitod aicynoj ari tu — symtus, pīcus voi koč vīnu!
avatar

jureits

  • 03 novembra 2009, 13:07
  • ↑
+
0
Juri vajadzātu sazatikt ar itīm 5 cylvākim i izrunotīs, teikšu gūdeigi as itymā lopā zaudejūs, jū gryuši orientātīs.
avatar

RolandsPilka

  • 18 novembra 2009, 00:53
  • ↑
+
0
dūma loba, bet reāli kai tu īzadūmoj itū vysu. Vāgos:
— 100 tautā popularus un izgleitōtus (vālams gūdeigus)cylvākus.
— publikacejis avīžos i internetā (finansu leidzekļi?)
— vaļsts myerķis, kuram nūticās tauta i kaidus lobus dorbus!
Ja tev tys vyss ir īstrōdos tod as varu tev paļeidzāt!
avatar

RolandsPilka

  • 29 oktobra 2009, 14:04
+
0
Pat pīnemūt ka leloikuo daļa latgalīšu nūbolsoitu par latgalisku parteju jei nikuo navarātu mainēt juo vairoikums ir ,,pareizīm latviešiem,, dzeive jau pīruodeja ka faktiski par Latcejis satversmi nav bolsuos nivīns latgalis deputats, izeja ir vīna — vysmoz suokumā autonoms veidojums.
avatar

Arvids

  • 23 janvara 2010, 00:18

Tikai registrātī lītuotuoji var īraksteit komentarus.