Sistema pa lelai daļai ir izstruoduota i var dorbuotīs. Tagad leluokais vaicuojums ir — cylvāku īsaisteišona kūpeigai sadarbeibai, deļtam acynoju vysus kūpeigi stuosteit ari citim aktivim ļaudim par apvīneibu «Latgolys Saeima» i aicynuosim jūs pīzaregistrēt itymā sistemā!

Īvods par apvīneibys «Latgolys Saeima» ideji ir puozaverams ite, bet tagad dalikšu ari apvīneibys darbeibys strategijis puors pamatprincypus, kurus prūtama līta varit ari papyldynuot:

1. Latvejis nuokūtne nav īdūmuojama bez latvīšu volūdys, tai pat ari Latgolys pamats ir myusu dzymtuo volūda. Īspiejamais rysynuojums – regionaluos volūdys statuss (TV i radejis raidejumi, cyti plašsazinis leidzekli latgaliski, informaceja īdzeivuotuojim latgaliski, vuiceibys īspieju nūdrūšynuojums vysuos Latgolys školuos — vysmoz leidzvierteigai kai pūļu volūda i kuļtura teik vuicāta pūļu školuos).

2. Myusu dīnom atbylstūša i efektiva sabīdreibys pīsadaleišona vaļsts veiduošonā, deļ tam APVĪNEIBA lelu dali sovys darbeibys i sovstarpejuos sazinis veic internetā – pagaidam tys ir efektivuokais leidzeklis ari attuolynuotai sadarbeibai (sātys lopa, kūpeigais „blogs”, prīšklykumu izvirziešona, vīdūkļu apmaiņa, konkretu prīšklykumu izstruode i lāmumu pījimšona).

3. Latvejā ir vajadzeiba izveiduot styprys regionalys pašvaļdeibys, Latgolā ir vajadzeigs kūpejs redzīņs iz kulturys i ekonomikys vaicuojumu sakuortuošonu.

4. Vajadzeigs objektivs i kritisks redzīņs iz Latgolu puorstuovūšū politiķu darbeibu. Leidzšinejuos darbeibys izviertejums i kūpeigs redzīņs par tuoluoku regiona interešu puorstuovnīceibu vysuos vaļsts īstuodēs.

Breivūs ļaužu apvīneibā „Latgolys Saeima” darbeibys princypi:
— darbeibys pamatā ir vysys Latgolys i APVĪNEIBYS pozitivs tāls i optimistisks redzīņs iz nuokūtni;
— vysi lāmumi teik pījimti ar vīnkuoršu bolsu vairuokumu (izjamūt: kupā izvirzātūs mierķu i darbeibys princypu pylnveiduošona i papuldynuošona var nūtikt ar 2/3 — diveju trešdaļu — APVĪNEIBYS dalinīku atbolstu);
— APVĪNEIBĀ var īzasaisteit sevkurš cylvāks, kas aplīcynoj sovu gataveibu kūpā sasadorbuot itymā dokumentā izvirzātūs princypu īvāruošonā, kai ari sovu lāmumu pījimšonys naatkareibu nu sevkura finansiala voi politiska spāka;
— kotra latgalīšu sabīdriska organizaceja var rakstiski pylnvaruot vīnu APVĪNEIBYS dalinīku puorstuovēt ari attīceigū bīdreibu „Latgolys Saeimā”, vīns cylvāks puorstuov sevi ar 1 (vīnu) bolsu i papyldus var puorstuovēt na vairuok kai vīnu sabīdriskū organizaceji taitod ar vēļ papyldu 1 (vīnu) bolsu;
— īspiejami nagūdeiga APVĪNEIBYS dalinīka izsliegšonu var īrūsynuot sevkurš cyts dalinīks, bet, ja vairuokums naatbolsta izvirzātū prīšklykumu, tod nu APVĪNEIBYS vysmoz iz godu izslādzams pats prīšklykuma īrūsynuotuojs;
— kotram ir tīseibys iz sovu vīdūkli kaidā vaicuojumā, bet, vairuokumam vīnojūtīs, pījimtais lāmums ir kūpeigais redzīņs saziņā ar trešajom personom; ka APVĪNEIBYS dalinīka individualais uzskots atsaškir nu kūpeiguo, tod, tū publiskojūt, ir juoatzeimej, ka tys ir tikai personiskais redzīņs;
— kotrys APVĪNEIBYS dalinīks apsajem atbaļsteit „Latgolys Saeimys” dorba ilglaiceigumu i piecteceibu, deļ tam skaidroj tuos darbeibys princypus nuokamajim potencialajim „Latgolys Saeimys” dalinīkim;
— APVĪNEIBYS kasdīnys darbeibys nūdrūšynuošonai teik īcalti 3 (treis) cylvāki: „Latgolys Saeimys” birojs.

Breivūs ļaužu apvīneibys „Latgolys Saeima” ideji atbolsta:
1. Jurs Viļums
2. Ilga Šuplinska
3. Valentins Lukaševičs
4. Valdis Viļums
5. Guntis Rasims
6. Maruta Latkovska
7. Arturs Uškāns
8. Andris Slišāns
9. Oskars Orlovs
10.…

Ka ari Tu atbolst apvīneibu «Latgolys Saeima» i itūs darbeibys princypus darokst sovu vuordu komentaru sadalī!