Laiks skrīn kai troks i navar pagiut apdareit vysus dorbus, bet juorauga golvonuos idejis napagaisynuot. Deļ tam raudzeisim «Latgolys Saeimys» ideji pa druskai īvīst dzeivē.

Pyrmais vaicuojums ir myusu sovstarpejuos sadarbeibys princyps. Muns pīduovuojums ir taids:
1.) kotrs nu myusu var izvirzeit kaidu problemu voi vaicuojumu — nūpublicej tū ite: kūpeigajā blogā aba dīnrokstā «Latgolys Saeima»;
2.) visim «Latgolys Saeimys» dalinīkim iz e-postu aizīt par tū ziņa (pīregistrātajim lītuotuojim automatiski, puorejim pagaidam as nūsyuteišu personeigi);
3.) teik dūta nedeļa laika visim (kotram nu jiusu) īsapazeit ar izvirzātū vaicuojumu, snīgt sovu komentaru, prīšklykumus, īspiejamūs rysynuojumus;
4.) piec nedelis teik nūformulāts bolsuojuma vaicuojums ar īspiejamajim atbiļžu variantim i otkon visim «Latgolys Saeimys» lītuotuojim iz e-postu aizīt aicynuojums nūbolsuot;
5.) nu jau ūtruos nedelis laikā kotrs sev izdeveigā breidī var īīt «Latgolys Saeimā» i nūbolsuot;
6.) taitod divu nedeļu laikā myusim byus viertejums i gotovs prīšklykums izvirzātajam vaicuojumam voi problemai un attīceigū prīšklykumu tod kūpeigi varēsim virzeit tuoļuok.

Taitod aicynoju leidz 27.janvaram izsaceit sovus prīšklykumus par itaidu pīduovuojumu tuoluokai sadarbeibai ituo roksta komentarūs voi ari nūsyuteit maņ iz e-postu: jureits@jureits.lv