Oktobrī īslādzu datoru i uzliku, kab skaņ Latgolys radeja. Dzierdeju i volūdu, i dzīsmeites. Tai maņ tys vyss cīš, cīš paleidzāja apgiut volūdu i īpazeit latgalīšu muzyku.

Dīvamžāļ, na iz ilgu laiku. Vāluok radejā suocēs nalykumeibys. Vysi jau poši zyn kas i kai beja. Kai latgalīši tūmār panuoca taisneibu! Kaidi koncerti tyka reikuoti radejis lobdareibai! As poša beju iz Kongresu nomu Reigā. Kai tī muzykanti uzastuojās gandreiž 3 stuņdu gorā koncertā! As beju emoceju pylna…

Radeja deve cīš daudz gaņ pošim muzykim, gaņ klauseituojim, gaņ tīm vysim darbinīkim, kuri atdeve vysu sovu sierdi i dvēseli, kab byutu latgaliska radeja. Tys ir svareigai, as uzskotu.

Tān beidzūt jauni īpašnīki – bazneica. Nazynu eisti kaida, bet tys, ka bazneica, tys skaidrs. Nui, i togad juocer, ka varies sarunuot ar juo kaidys turpmuokas radejis atteisteibys gaitys. Juocer, ka nabyus kristeiguo radeja, juocer, ka radeju vareis atteisteit kai myusdīneigu, vēļ lobuoku Latgolys radeju. Varbyut as dzeivuoju sapyņūs, bet maņ līkas, ka patīšom byus otkon vyss kuorteibā, ka saīs vyss iz lobuo pusi.

Kai jiusim līkas — cik lelu svareiguma pakuopi latgalīšu kuļturā ījem Latgolys radejas darbeiba i atteisteiba? Cik lela nūzeime itai radejai ir jiusu dzeivē ?

Asmu par tū, kab byutu otkon Latgolys radeja, kur byutu raidejumi, muzyka, zinis i lyugšona… ci vēļ koč kas breineigs latgolīšu kuļturys atteisteibai.

Jau sestuos Atzolys aizvadeitys i as cīš ceru, ka tys ir tikai suokums i byus vēļ daudz, daudz Atzolu i atzolīšu. A varbyut kaidu dīnu pat myusu mozī byus atzolīši… :) Ar taidu mierki vajadzietu turpinuot Atzolu tradīcejas i dareit stypru myusu kuļturu! Tys ir koč kas vīnreiziejs, kas myusūs roda vairuok vīnuoteibys, kuļturys apsazinuošonu i svareigumu. Tei nabeja vīnkuorši parosta izklaide, tei beja koč kas vairuok.

Latgola, volūda — Latvejas kuļturys baguoteiba. As cīš, cīš grybātu, kab aizvīn vairuok cylvāku vysā Latvejā spētu nūviertēt itū baguoteibu, tū skaiškuo kuļturu, cylvākus, dzeivesprīku, tūs atrakteivuos jaunīšus – myus. Kreize ir partū, ka mes poši kai tauta, kai vīnuota nāceja naatzeistam sevi, mes tīcamīs iz nazkū, naatteistam tū, kas myusim jau pīder. Latvejā nateik nūviertēts latgaliskais, nateik nūviertietas taidys nūmetnys kai Atzolys. Kur, pīmāram, palyka Vosoruošona? Bet mes nadreikstam padūtīs, ir juoturpyna i juoatteista Atzolu breinums – atzolīši.

Maņ beja cīš lels prīks pīsadaleit Preilūs, Atzolu seminārā (kai tys šūgod beja nūdievēts). As ceru, ka jius vysi saskotat Atzolās kū vairuok par vīnkuoršu tuseņu.
Leidz nuokomojam godam, muni jaukī draugi, partū, ka as nūteikti nagribu byut tikai „vīna goda atzolīte”! :)