Voi esi izdarejs vysu, lai Latveja byutu taida, kaidā Tu gribi dzeivuot? Leidzšinejuo politiskūs parteju (jeb dažaidu finansialūs grupiejumu) darbeiba Latvejā i pašreizejuo situaceja vaļstī paruoda, ka mes ar Tevi nadreikstam stuovēt molā. Voi Tu vēļ tic, ka Latveja var kliut par atteisteitu i regionaluos vierteibys (volūda, kuļtura, ļauds...) atbolstūšu vaļsti? Tod aicynojam pīsavīnuot breivūs ļaužu apvīneibai „Latgolys Saeima”. Tei nav jauna bīdreiba, tei nav vaļsts īstuode, tei nav parteja, bet gon Tova īspieja pīsadaleit taidys Latgolys i taidys vaļsts veiduošonā, kaidā gribi dzeivuot pats i kaidā gribi, lai dzeivoj Tovi bārni i unuki.

Itei nav reklama. Tys ir ciļvieceigs aicynuojums kūpā veiduot sovu regionu i sovu vaļsti iz sapruoteigim, demokratiskim, tīsiskim i gūdeigim princypim, kuru pamatā ir cylvāks – taitod ari Tu!

Vysleidz – lai cik dažaidi ļauds mes byutu, mes kūpā puorstuovam Latgolu i kūpā veidojam itū vaļsti. Mes raugam apvīnuot ļauds naatkareigi nu socialuo, finansialuo stuovūkļa, naatkareigi nu politiskuos pīdereibys, religiskuos puorlīceibys, izgleiteibys leimeņa i cytim aspektim, ar golvonū aizdavumu panuokt Latgolys i leidz ar tū ari Latvejis sakuortuošonu i uzplaukumu vysuos jūmuos.

Dūma ir taida, ka itaids interaktivais resurss varātu apvīnuot ļauds nu dažaidu Latvejis molu i savest kūpeigai vīdūkļu, redzīņu apmaiņai... lai tuo rezuļtatā izstruoduotu konkretus prīšklykumus eistynuošonai realajā dzeivē. Deļ tam vajadzeiga gona lela aktivitate nu kotra cylvāka - ka taidys nabyus, tod ari itai lopai nabyus jāgys.